អន្តរជាតិ៖ លោក Thomas Bach ប្រធានគណៈកម្មការអូឡាំពិកអន្តរជាតិ (IOC) បានលើកឡើងនៅថ្ងៃពុធម្សិលមិញនេះថា គណៈកម្មការអូឡាំពិកកូរ៉េខាងជើង នឹងត្រូវដកសិទ្ធិសម្រាប់ការប្រកួតរាល់ព្រឹត្តិការណ៍កីឡានានារហូតដល់ដំណាច់ឆ្នាំ២០២២ ក្រោយពីគណៈកម្មការអូឡាំពិកប្រទេសនេះខកខានមិនបញ្ជូនអត្តពលិករបស់ខ្លួន ដើម្បីចូលរួមនូវព្រឹត្តិការណ៍កីឡាអូឡាំពិក ដែលរៀបចំនូវទីក្រុងតូក្យូ ប្រទេសជប៉ុនកាលពីពេលកន្លងទៅ។ ការដកសិទ្ធិនេះមានន័យថា កូរ៉េខាងជើងនឹងមិនអាចចូលរួមការប្រកួតកីឡារដូវរងារ ដែលរៀបចំនៅប្រទេសចិន នាខែកុម្ភៈ ឆ្នាំ២០២២ខាងមុខនេះឡើយ។
ក្នុងសន្និសីទសារព័ត៌មានមួយ លោក Thomas Bach បាននិយាយថា៖ "គណៈកម្មាធិការអូឡាំពិកជាតិនៃសាធារណរដ្ឋប្រជាមានិតប្រជាធិបតេយ្យកូរ៉េត្រូវបានផ្អាកពីការចូលរួមព្រឹត្តិការណ៍នានាក្រោមការរៀបចំរបស់គណៈកម្មការអូឡាំពិកអន្តរជាតិរហូតដល់ដំណាច់ឆ្នាំ ២០២២ ដោយសារការសម្រេចចិត្តឯកតោភាគីមិនចូលរួមក្នុងព្រឹត្តិការណ៍អូឡាំពិកទីក្រុងតូក្យូ ២០២១នេះ"។ ការប្រកាសនេះមានន័យថា គណៈកម្មការអូឡាំពិកកូរ៉េខាងជើង នឹងមិនទទួលបានការគាំទ្រផ្នែកហិរញ្ញវត្ថុក្នុងអំឡុងពេលស្ថិតក្នុងបំរាមនេះ។
យ៉ាងណាក្តី IOC បានលើកឡើងជាមុនថា គណៈកម្មការអូឡាំពិកអន្តរជាតិនៅតែមានសិទ្ធិក្នុងការសម្រេចផ្លាស់ប្តូរនាពេលក្រោយចំពោះការអនុញ្ញាតឱ្យអត្តពលិកជាលក្ខណៈបុគ្គលដែលបានឆ្លងផុតវគ្គជម្រុះឈានដល់ការប្រកួតនៅប្រទេសចិន ឆ្នាំ២០២២ ព្រមទាំងរក្សាសិទ្ធិក្នុងការសម្រេចជាថ្មីចំពោះថេរវេលាកំណត់នៃការដាក់ពិន័យទៅលើប្រទេសកូរ៉េខាងជើង។
គួរបញ្ជាក់ថា កូរ៉េខាងជើងគឺជាប្រទេសតែមួយគត់ដែលមិនបានបញ្ជូនអត្តពលិករបស់ខ្លួនទៅចូលរួមក្នុងព្រឹត្តិការណ៍កីឡាអូឡាំពិក ទីក្រុងតូក្យូ ឆ្នាំ២០២១នេះ ហើយ IOC ក៏បានព្រមានជាមុនចំពោះប្រទេសកូរ៉េខាងជើង ជុំវិញទណ្ឌកម្មវិន័យនានាដែលនឹងអាចដាក់លើគណៈកម្មការអូឡាំពិកកូរ៉េខាងជើងប្រសិនបើស្ថាប័ននេះមិនបញ្ជូនអត្តពលិករបស់ខ្លួនមកចូលរួមទេនោះ។ គួរបញ្ជាក់ផងដែរថា កន្លងមកកូរ៉េខាងជើងក៏បានប្រកាសដកខ្លួនពីព្រឹត្តិការណ៍កីឡាធំៗជាច្រើន រាប់ទាំងការដកខ្លួនពីការប្រកួតជម្រុះ FIFA World Cup តំបន់អាស៊ីផងដែរ ដែលគេជឿជាក់ថា ទំនងមកពីការព្រួយបារម្ភពីបញ្ហាវិបត្តិកូវីដ-១៩៕
